مخالف ڌر عدم اعتماد جي رٿ سميت جيڪو به پلان آڻي اسان تيار آهيون، انهن کي هڪ ڀيرو ٻيهر شڪست ٿيندي: وزيراعظم

منڊي بهاءُ الدين – 18 فيبروري (اي پي پي) وزيراعظم عمران خان چيو آهي ته مخالف ڌر عدم اعتماد جي رٿ سميت جيڪو به پلان آڻي اسان تيار آهيون، انهن کي هڪ ڀيرو ٻيهر شڪست ٿيندي، نواز شريف بيماري جو بهانو بڻائي ملڪ مان ڀڄي ويو، ڦريل دولت جي واپسي تائين چورن جو پيڇو نه ڇڏيندس، جيستائين قوم جو ڦريل پئسو واپس نه ٿا ڪن اين آر او نه ملندو، مخالف ڌر ڦورن جو ٽولو آهي جيڪو مون کان ڊڄي ٿو، مخالف ڌر عدم اعتماد جي رٿ ان لاءِ آڻڻ چاٿي ٿي ته جيئن حڪومت هلي وڃي ۽ هي سزائن کان بچي سگهن، مهانگائي جي ڪري عالمي سطح تي شين جي قيمتن ۾ اضافو آهي، هر وقت سوچيندو رهندو آهيان ته عام ماڻهو کي ڪيئن ريليف ڏئي سگهجي ٿو. اهڙن خيالن جو اظهار هن عوامي رابطا مهم جي سلسلي ۾ عوامي جلسي کي خطاب ڪندي ڪيو. ان موقعي تي وفاقي وزير ۽ قومي اسيمبلي ميمبر پڻ موجود هئا. وزيراعظم چيو ته نواز شريف کي ڪڏهن هڪ بيماري ڪڏهن ٻي بيماري ٿي رهي هئي، نواز شريف بيماري جو بهانو بڻائي ملڪ مان ڀڄي ويو، جيستائين قوم جو ڦريل پئسو واپس نه ٿا ڪن اين آر او نه ملندو، ڦريل دولت جي واپسي تائين چورن جو پيڇو نه ڇڏيندس. هن چيو ته جڏهن خيبرپختونخواهه ۾ اسان جي پهرين حڪومت قائم ٿي ته اسان کي چيو ويندو هو ته ڪٿي آهي نئون خيبرپختونخواهه؟ پر جڏهن 2018ع ۾ خيبرپختونخواهه ۾ چونڊون ٿيون ته عوام اسان کي ٻه ڀاڱي ٽي اڪثريت ڏني ڇو ته اسان جي دور ۾ خيبرپختونخواهه ۾ تيزي سان غربت ۾ گهٽتائي ٿي هئي. وزيراعظم چيو ته مخالف ڌر چورن جو ٽولو ۽ ڦورن جو گلدستو آهي، ان ۾ هڪ شخص آهي جنهن کي آئون مولانا ناهيان چوندو، ڊيزل سڀني کي گڏ ڪري هر ٻن مهينن کانپوءِ حڪومت ڪيرائڻ جي ڳالهه ڪري ٿو، پهريون ڀيرو اسيمبلي ڊيزل کانسواءِ هلي رهي آهي، ڊيزل 12 هون رانديگر بڻيل آهي. وزيراعظم چيو ته مخالف ڌر ڊنل آهي، فضل الرحمان انهن کي ڊيڄاري رهيو آهي ته جلدي سان حڪومت ڪيرايو نه ته 2023ع جي اليڪشن به وئي. هن چيو ته هڪ وڏو ڀڳوڙو ميان آهي ۽ ٻيو ننڍو ميان آهي جنهن جي دل وڏي ڪمزور آهي ان کي خبر آهي ته مقصود چپڙاسي جي اڪائونٽ ۾ 375 ڪروڙ رپيا ڪيئن آيا. هن چيو ته اهي چور ۽ ڦورو ڊنل آهن، 20 سالن کان هڪ ٻئي کي چور ۽ ڦورو چئي رهيا آهن. هن چيو ته مقصود چپڙاسي ننڍي ميان جي رمضان شگر مل ۾ 15 هزار رپين جو ملازم هو، ان جي بئنڪ اڪائونٽ ۾ ايف آءِ اي پتو لڳايو ته 375 ڪروڙ رپيا آيا آهن جنهن تي اڳ ۾ ننڍي ميان پنهنجي پٽ کي رات وچ ۾ لنڊن فرار ڪرايو، پوءِ پنهنجي ناٺيءَ کي به ٻاهر موڪلي ڇڏيو، ان کان اڳ ڀڳوڙي ميان جا ٻه پٽ (ن) ليگ جي دور ۾ ٻاهر هليا ويا هئا، منشي اسحاق ڊار کي ڪير وساري سگهي ٿو ان کي شاهد خاقان عباسي جڏهن وزيراعظم هو ته عوام جي ٽيڪس جي پئسي سان پنهنجي جهاز ۾ ان کي ٻاهر موڪلي ڇڏيو. وزيراعظم چيو ته جيڪڏهن انهن چوري ناهي ڪئي ته ڊپ ڪهڙي ڳالهه جو آهي، انهن سڀني کي عمران خان جو ڊپ آهي ڇو ته عمران خان جي ڪير قيمت نه ٿو لڳائي سگهي، پرويز مشرف وانگر انهن کي اين آر او نه ملندو، پرويز مشرف ته حديبيه پيپرز ملز ڪيس ۾ اين آر او ڏئي ڇڏيو هو، ڪيس انهن جا پراڻا آهن اين آر او اسان کان گهري رهيا آهن، جيستائين زندهه آهيان ڦريل دولت جي واپسي تائين پيڇو نه ڇڏيندس، ڦورن کي ڪو اين آر او نه ملندو. وزيراعظم چيو ته اڄ ملڪ جون عدالتون آزاد آهن، شهباز شريف جسٽس قيوم کي ٽيليفون ڪندو هو ته ٽن سالن جي نه پنجن سالن جي سزا ٻڌايو، اڄ عدالتن تي ڪير حملو نه ٿو ڪري، اسان عدالتن جو احترام ڪريون ٿا، مريم نواز چوي ٿي ته مون وٽ ٽيپس آهن، ڪڏهن توهان ٻڌو ته سياستدان ٽيپس رکندا هجن ۽ انهن جي ذريعي ججن کي بليڪ ميل ڪندا هجن، سياستدان ائين ناهي ڪندو ائين مافيا ڪندي آهي، ان مافيا جو قوم کي مقابلو ڪرڻو آهي، جيستائين زندهه آهيان انهن چورن جو مقابلو ڪندس. وزيراعظم چيو ته عدم اعتماد جي ووٽ جي لاءِ ڊيزل جي ته خبر پئجي وئي آهي ته ان کي جلدي ڇو آهي، شهباز شريف کي مقصود چپڙاسي جي ڪري مشڪل پئجي وئي اهي، ان کي خبر آهي ته جڏهن به مقصود چپڙاسي جو ڪيس ٻڌو ويو ته شهباز شريف بچي نه سگهندو، جيڪڏهن پنهنجو پاڻ کي بي قصور چون ٿا ته عدالتن کان وقت ڇو ٿا وٺن، چور نه آهن ته روزاني جي بنياد تي ٻڌڻي جو چون. وزيراعظم چيو ته جڏهن منهنجي خلاف انهن سپريم ڪورٽ ۾ ڪيس ڪيو ته آئون ٻاهر نه ڀڳو هئس، مون سپريم ڪورٽ ۾ بيهي ثابت ڪيو ته صادق ۽ امين آهيان، جيڪي جيڪي دستاويز سپريم ڪروٽ مون کان گهريا مون ڏنا، مون ته تاريخون نه ورتيون بلڪه سپريم ڪورٽ کي درخواست ڪئي ته جلدي منهنجو ڪيس ٻڌو وڃي، شهباز شريف ڇو ڀڄي رهيو آهي، پٽ کي ڇو ٻاهر ڀڄرائي ڇڏيو آهي، ڀڳوڙي ميان جا ٻه پٽ ڇو ٻاهر ڀڄي ويا آهن، مريم نواز چوڌري شگر ملز جي لاءِ دبئي مان موڪليا ويندڙ 80 ڪروڙ رپين بابت ٻڌائي، اها به ڪيس کان ڀڄي رهي آهي ۽ ججن کي ڊيڄاري رهي آهي، عدم اعتماد اهي ان لاءِ چاهين ٿا ته جلدي جلدي حڪومت هلي وڃي ۽ اسان ٻيهر ڪنهن طرح بچي وڃون، شريف خاندان کي منهنجو پيغام آهي ته توهان جيڪو به ڪرڻ چاهيو ٿا اسان تيار آهيون، جيڪو به توهان جو منصوبو آهي ڪپتان ان جي لاءِ تيار ويٺل آهي، هاڻي توهان کي ٻيهر شڪست ٿيندي ۽ جيل ويندا. وزيراعظم چيو ته مخالف ڌر چوي ٿي ته ملڪ ۾ تمام گهڻي مهانگائي ٿي وئي آهي، ان ۾ ڪو شڪ نه آهي ته مهانگائي آهي، هر وقت سوچيندو رهندو آهيان ته ڪهڙي طرح عوام کي ريليف ڏيان ۽ قوم جو بار گهٽ ڪريان، صحافي اهو به ٻڌائيندا ڪن ته مهانگائي جا سبب ڪهڙا آهن، ڪورونا جي ڪري پوري دنيا ۾ شين جي چرپر بند ٿي وئي جنهن جي ڪري شين جي قيمتن ۾ اضافو ٿيو، 8، 9 مهينا اڳ 40 ڊالر في بيرل هو، اڄ 90 ڊالر في بيرل پيٽروليم اسان درآمد ڪريون ٿا، اسان عوام تي بار گهٽ ڪرڻ جي لاءِ ٽيڪسز ۽ ڊيوٽي ۾ گهٽتائي ڪئي، هر مهيني حڪومت کي ٽيڪس ۽ ڊيوٽي گهٽ ڪرڻ جي ڪري 70 ارب رپين جو نقصان ٿئي ٿو پر اسان قدم کڻي رهيا آهيون ته ڪهڙي طريقي سان عوام تي بار گهٽ ڪيو وڃي. وزيراعظم چيو ته پيپلزپارٽي ۽ (ن) ليگ جي دور ۾ اڄ کان وڌيڪ مهانگائي هئي، آمريڪا ۾ 40 سال، برطانيا ۾ 30 سال، جرمني ۾ 26 سال ۽ ترڪي ۾ 20 سالن کانپوءِ سڀ کان وڌيڪ مهانگائي آهي. وزيراعظم چيو ته اسان جي بدقسمتي آهي جو اسان تيل، ڪوئلي، گئس ۽ گيهه سميت جيڪي به شيون درآمد ڪريون ٿا انهن جي قيمت ٻيڻي ٿي وئي آهي. وزيراعظم چيو ته ملڪ صحيح رخ ۾ گامزن آهي، روانگي واپار ۽ ٽيڪس اوڳاڙي رڪارڊ تي آهي، ٻاهرئين ملڪ رهندڙ پاڪستانين ڪڏهن ايترو وڌيڪ پئسو ملڪ ۾ ناهي موڪليو جيترو اڄ موڪلي رهيا آهن، سمنڊ پار پاڪستاني اسان جو سڀ کان قيمتي اثاثو آهن، انهن کي پهريون ڀيرو ووٽ جو حق ڏنو ويو آهي، زرعي شعبي ۾ آبادگارن جي ايتري آمدني اڳ ۾ ڪڏهن ناهي ٿي جيتري هاڻي ٿي رهي آهي، آبادگارن کان ڪمند تي ڪٽوتي ڪئي ويندي هئي، قانون منظور ڪرائي انهن کي پوري قيمت ڏياري رهيا آهيون، انهن کي ادائيگي جي لاءِ انتطار نه ٿو ڪرڻو پوي. وزيراعظم چيو ته پهريون ڀيرو ملڪ جي پرڏيهي پاليسي آزاداڻي آهي، پاڪستان ڪنهن ٻئي ملڪ کان ڊڪٽيشن نه ٿو وٺي، اڳوڻين حڪومتن جي دور ۾ پاڪستان تي ڊرون حملا ٿيندا هئا، اسان جو اتحادي ملڪ ئي اسان جي ملڪ تي بمباري ڪندو هو ۽ اسان جا حڪمران خاموشي سان تماشو ڏسندا رهندا هئا ڇو ته انهن جي دولت ۽ ڪاروبار ٻاهرئين ملڪ هئا ۽ هو انهن جا غلام هئا، جيڪڏهن آئون به پئسو چوري ڪري ٻاهر موڪلي ڇڏيان ته آئون به نه ڳالهائي سگهان ۽ آئون هڪ سپر پاور کي اهو نه چوان ته توهان کي ايئر بيس نه ڏيندس. هن چيو ته اسان جي دور ۾ ڊرون اٽيڪ ڇو نه ٿا ٿين. وزيراعظم چيو ته ملڪ ۾ آءِ ٽي جي شعبي ۾ انقلاب اچي رهيو آهي، پهريون ڀيرو ملڪ ۾ آءِ ٽي جي روانگي واپار ۾ 70 سيڪڙو اضافو ٿيو آهي، ان سان روزگار جا موقعا وڌندا، ڪامياب پاڪستان تحت ٻه نوان پروگرام آندا پيا وڃن، وياج کانسواءِ نوجوانن کي قرض ڏنا ويندا ته جيئن اهي پنهنجي لاءِ نوڪريون پاڻ ڳولي سگهن. ان کانسواءِ پهريون ڀيرو هر خاندان کي 10 لک رپين جي هيلٿ انشورنس ڏني ويندي ۽ اهي هيلٿ ڪارڊ سان مفت علاج ڪرائي سگهندا. وزيراعظم چيو ته مديني جي رياست جو بنياد ٻن اصولن انصاف ۽ امر بالمعروف تي رکيو ويو هو، اسان پاڪستان کي هڪ فلاحي رياست بڻائڻ چاهيون ٿا ۽ صحت ڪارڊ جي فراهمي ان سلسلي ۾ وڏو قدم آهي، مارچ تائين سڀني کي هيلٿ انشورنس جي سهولت ملي ويندي، ان جي لاءِ 400 ارب رپيا رکيا ويا آهن.